饒平客話親子共學割禾咧

饒平客話親子共學割禾咧
文/臺灣客語薪傳師邱美都2014.4.17

這擺係割禾个時節，大家見面相借問，毋係你通過幾多腔？就係四縣腔仰般？大埔腔仰般？詔安腔仰般仰般…。上課坐齊後，邱先生調查統計，既經全部通過客語百句認證饒平腔，還有幾儕通過六腔，比預訂目標過多咧，實在無簡單，早早入來教室个客委會輔導員陳松吉，連聲講：「當慶哦！愛接續下去…」。

為著分大家在課程活動結束以後，還做得複習，或者摎親朋好友推廣饒平客話，邱先生帶來自家个錄影機，由邱先生講華語，學員共下朗讀饒平客話，分六單元錄做學習成果光碟，有《臺灣客語饒平腔百句認證》教材、《臺灣客語能力認證初級基本詞彙饒平腔》精選220個語詞、唐詩〈金縷衣〉，童謠〈遊戲歌〉、改編歌〈四儕老虎〉、〈食飽吂〉、自創歌曲〈湊合饒平客話〉……大家都恁指望趕早看著講客个成果。

最尾一節，邱先生慢慢仔講客，學員同時換做華語講出來，邱先生連接講客，十分鐘講無停，無想到大家輕鬆接講華語來，可見經過七擺个學習，大家既經入門咧！邱先生講：「師傅領入門，功夫自家分。」希望大家連續下去。最尾分下去這擺饒平客話親子共學班學習滿意調查問卷，大家歡喜寫出自家感受，還希望繼續開班正做得過加學客。

轉屋下前，邱先生摎大家宣布：因為大家煞猛學習，全部通過客語百句認證，下禮拜三上晝愛舉辦「饒平客語在靜修國小復活」个記者會，大家牽手來參加，見證人厓兜共下創造个紀錄，就係員林客語復育成功个成果。