記饒平客語在員林復活

記饒平客語在員林復活

文/臺灣薪傳師邱美都

員林係臺灣頭名个鎮，人口逼近12.5萬，有三股二係客人，做得喊講係臺灣饒平客最大个庄頭，但是這下罕見有地方人會講客。員林鎮靜修國小本土語言邱美都先生，乜係臺灣績優文史教育工作者，為著復育母語，花費一年時間煞猛學客，高分通過客委會中高級認證，還變做彰化縣唯一个饒平腔客語薪傳師。

2014年除忒利用朝晨時間義務指導學生客語社團，同步積極摎客委會申請傳習計畫，推展「饒平客話親子共學」活動。短短仔兩個月，靜修國小客語教學成果恁豐湃哦！有三十五名親子通過客委會「客語百句認證」饒平腔，其中有十二名通過六腔認證，在員林成功復育消失个饒平客話。

客語薪傳師邱美都表示，客語饒平腔在臺灣面臨消失个危險，勞力客委會經費補助，靜修國小沗手，分親子共下來學百年前祖宗言，體會前人个生活語言智慧。這擺參加親子共學摎朝晨社團个學員，最細係九歲，最老係七十歲，輕鬆入門，開口講客，人巨兜緊學緊跋起咧，有三十五名參加客語百句認證全部都通過，總共得到百零張客委會客語百句認證合格證書，看著靜修國小恁樣昌盛个饒平客語苗圃，從無到有，實在無簡單哦！

靜修國小校長黃榮森講：「客語饒平腔在靜修國小生根發芽，真有歷史教育意義，希望大家共下來學客，分員林个客語教育做得茁壯成林。參加學員紛紛在問卷調查表頂項，寫出學講饒平客話个感受，乜希望客委會、靜修國小、薪傳師，大家共下連續支援合作開班，人巨兜愛繼續學客，還愛主動邀約親朋好友，共下來靜修國小學講饒平客話。