學客恁生趣

靜修國小饒平客話親子共學班  

教學日誌4學客恁生趣

2014.3.27(四)下午1-4點        

文/臺灣客語薪傳師邱美都

上課咧！大家歡喜入坐，這擺上課主題係有關「行」个14句生活會話、18個詞彙、「人際」主題8個詞彙、「代詞」詞彙11個，還有邱先生編寫个9句臺灣各地饒平客聚落个地方話同故事。

大小朋友唸出來个饒平客話，緊來緊準緊遽咧！實在恁會哦！特別係兩、三字个語詞，還自家會簡單造句變化，長透引起一駁笑聲，連邱先生乜加入，講講笑笑當中學客，大家恁歡喜。

邱先生摎長年研究過个饒平客庄俗諺編寫做教材，同時貼到員林郡文史工作室部落格頂項，還大聲唱饒平山歌「薪傳」分大家聽，得到恁多鼓掌。講到桃園過嶺、新竹林家、卓蘭老庄、彰化員林、永靖、埔心、田尾，臺灣饒平客庄个老古人言故事，還有邱先生年後去廣東饒平訪問，交流饒平客話个經驗，字墨恁飽个邱先生開講地方老古事，大小朋友特別感覺恁心色。

下課時節，大小朋友還討論員林家鄉个河洛話俗諺，愛仰般變做饒平客話，邱先生耐心慢慢仔逐儕回答，學員過加跈唸幾擺，就做得學起來，開容笑面講：「學客恁生趣咧！邱先生勞力！」人厓兜靜修國小饒平客話親子共學班實在煞猛，好得有客委會補助這擺个傳習計畫，勞力哦！