彰縣最強的饒平客話種苗園

彰縣最強的饒平客話種苗園

靜修國小饒平客話親子共學班   
教學日誌22014.3.13(四)下午1-4點 
       文/臺灣客語薪傳師邱美都

三月十三日客語教室又鬧熱煎煎，大布條有學員學客个相片，門口个海報愛歡迎客委會輔導員陳松吉，還有彰化縣本土語言輔導團江世冠主任來指導。開始上課咧！複習个朗讀聲恁熟絡，因為大家轉屋下都有練習講客一下。

這擺學客內容係有關「衣」个21個詞彙、12句生活會話，大家跈邱先生慢慢仔念，兩、三個字个詞彙唸著好勢，係講拄著特別个發音愛加強解說範唸：例如v万、ng兀、oiㄛ一，短促音dㄉ、gㄍ、bㄅ等，差毋多做得正確發音，有成時還吂範唸，學員看標音做得自家唸出來，實在恁慶哦！無想到細仔人个構音比大人較好咧！雖然長句唸著較無順序，毋過經過邱先生斷句技巧朗讀个指導練習，慢慢仔積存經驗，大家都暢快唸無停哦！還有唐詩「金縷衣」个朗讀，邱先生用歌仔戲調唱分大家聽，短期內還無法度連續唱完整，總愛過加練唱幾多擺，定著會進步。

這擺勞力江主任指導大家仰般上網操作「客語百句認證網」摎「哈克網路學院客語教學初級認證教材」，還有陳松吉輔導員个稱說：靜修國小饒平客話親子班當煞猛，希望大家共下來講饒平客話，切莫分時間打走祖宗言。最尾，大家歡喜共下翕相，有个Line、有个PO面書仔，邱先生分享到部落格，摎鄉親朋友交流，人厓兜「靜國小饒平客話親子共學班」係彰化縣恁會个饒平客話種苗園，希望學員緊喊緊入心，有更加人來講饒平客話。