在員林成功復育消失的母語：饒平客話

彰化縣百年饒平客語第一班

靜修國小饒平客話親子共學班開講

臺灣客語薪傳師邱美都

在員林成功復育消失百年的母語

靜修國小饒平客話親子共學班 教學日誌

2014.3.6(四)下午1-4點  文/臺灣客語薪傳師邱美都

這係百年來當特別个日，員林擲忒百年个祖宗言「饒平話」，頭擺愛在靜修國小客語教室開講。無想到十二對大人細子全部早就來到現場，遽遽完成簽到同領教材个事，一點鐘準時開幕。參加个學員全部係講福洛話，無聽過饒平客話係麼个，後生感覺奇特，大人講饒平客話係祖宗言，老早就想學客，得人惱係無先生來教、無地方做得學講，這擺有機會跈邱先生學客，感覺當歡喜，愛勞力客委會同靜修國小。

薪傳師邱美都準備恁多長透用著个生活詞彙會話，愛分大家學習。這擺个主題係有關「飲食」的饒平話，有《好客100句》食1-16句、初級認證基本詞彙第四單元飲食精選48詞、臺灣客語饒平腔拼音對照表，還有邱先生自家改寫个饒平腔童謠《四儕老虎》摎《食飽吂》。

雖然，學員還吂熟悉講客个語音語法，有兜時節會合著一息仔福洛音，經過教學經驗豐富个邱先生範唸、領唸、正拼、反拼、團唸、自家唸、口頭測驗等等，無共樣个方式互動教學，朗朗个饒平客話無停過。下課時節，學員共下翕相，PO著fb分大家看。

靜修國小饒平客話親子共學班个大小朋友恁煞猛，進步實在係看得著，就像在員林饒平客語沙漠當中，看到一細坵希望綠洲，薪傳師感覺當溫暖，確定這擺復育員林个饒平客話係成功个開始，定著會打拼連接下去。

 從沒聽過講過饒平客家話的員林鄉親，希望能開口說客語，了解前人的生活智慧。左起港友、平祐、劍鏢、嘉政、育伶、榮森校長、薪傳師美都、月仙、班長云芳、黃美女、黃太太、麗安、百鍊、秀娟、淑美....，還有希望種苗的新生代(邱美都攝於靜修國小客語教室2014.3.6)