兩分鐘講人生

              



       
             兩分鐘講人生

                                                                               文/邱美都  

講著人生，逐家攏有無siang7款的看法，有人認為：人生海海，有量就有福，萬項代誌無啥物好計較，歡喜就好。

嘛有人認為：人生像苦海，趕緊向善修好品行，才會當早日解脫。雖然逐家攏有毋相仝的角度，毋過「一人一命，無雙人仝命。」好歹人生掌握佇家己的手內。

我認為：人生是一逝有進無退的精彩旅途，生活的鹹汫苦澀，每一个坎站攏濫濫摻摻，千萬毋通怨嘆運命歹，拋荒寶貴的青春。古早人咧講：「花無百日紅，人無千日好。」咱愛拍開心內的門窗，展開溜溜秋秋的目睭，利利的雙耳，體驗春天的生活滋味，往往就有大碗閣滿墘的好年冬。

人生嘛是一齣無戲文的連續劇，高潮佇過程，好歹戲尾據在家己按怎搬演。咱人佇江湖咧走傱，三不五時嘛會拄到海湧，抑是掃到風颱尾，老的老步定，少年的較懂嚇，這時陣千萬毋通驚，心頭掠予定，面對眼前的挑戰。俗語講得好：「樹頭徛予在，毋驚樹尾做風颱。」平常時愛捷學骨力做，心存良善拍拚衝，盡人事，順天意，想欲有「財子壽三字全」的前景，是無困難的。

人生講長誠長，天公伯仔賜咱百年青春通好車拚，咱就愛感恩惜福。毋過，話哪反倒轉來講，時間會走會飛，生活親像搬電影，一幕過一幕，百年生命越頭就行到戲尾矣，咱就愛把握。朋友矣！魚趁鮮，蝦趁跳，咱人愛趁茈(tshi2)，向望逐家鬥陣勇敢向前行，行出精彩的人生。
         

        

                         去英國莎士比亞的厝(楊文嘉攝)