饒平客話歡喜結訓

靜修國小饒平客話親子共學班   
教學日誌8
      2014.4.24(四)下午1-4點      
文/臺灣客語薪傳師邱美都

  這係最尾一擺饒平客話共學班共下講客个時節，大家特別感覺毋盼得，逐儕都提幾多張參加客委會百句認證个通過證書，面額卵笑微微仔，目目周金金，共下看昨晡日在客語教室辦个記者會新聞報導，報導內容：

1.客家電視臺記者李新隆報導：親子共學「客」程，饒平話傳承漸萌芽。

2.彰視新聞臺記者許士源報導：饒平客語快失傳，靜修百年來首開課。

3.中時電子報記者洪壁珍報導：員林靜修國小推廣客語獲認證。

4.臺灣導報記者林碧珠報導：靜修國小邱美都傳承饒平客話。

5.薯新聞記者陳文熹報導：客語薪傳師利用長才，推動教學檢測42位過關

還有邱先生寫个「饒平客話在靜修國小返生咧」，大家朗讀邱先生記錄共學班个學習過程摎成果，像饒平客話苗圃樣仔，生根必目，實在恁慶哦！黃校長恁歡喜，稱說邱先生，公開頒發「獨占鰲頭」个獎牌勞力人巨，頒發結訓證書，還主動宣導親子共學第二期愛接下來辦理，邀大家來靜修學習。學員聽著校長恁樣援助，紛紛擎手華客湊合講出學客个收成，還勞力邱先生、校長、客委會。

最尾，大家合唱邱先生新填詞个老古歌曲《湊合饒平客話》，著客家花布背心、綁好靚靚个花布頭巾，認同自家係客家人，大家共下翕相，共下大聲講：靜修國小饒平客話恁慶哦！饒平客話親子共學班歡喜結訓，大家湊伴愛連續學客，看著消失百年个饒平客話，在靜修國小返生咧，薪傳師邱先生滿心歡喜，決定愛同大家共下煞猛直直行，勞力！好得你！