共下來唱《湊合饒平客話》

共下來唱
《湊合饒平客話》

靜修國小饒平客話親子共學班  教學日誌5

2014.4.3(四)下午1-4點   文/臺灣客語薪傳師邱美都

歌詞詳見員林郡文史工作室http://ylcmd.blogspot.tw/2014/03/blog-post_5342.html

這係第五擺大家共下來講客，開始上課兩下半，無想到客委會輔導員陳松吉先生就恬肅肅入來教室，觀看學員學習情況，毋單淨詳細點名，還提翕相機翕無停，謙虛个陳先生開眉笑眼關心饒平客話个推廣情形。

除忒復習教材外，這擺上課个內容係生活上長透會聽著个話26個詞彙、20句，包含相借問、稱說、問答等，大家你講過來、人厓講過去，教室變著鬧熱煎煎。下課時節，大家像共屋人樣仔打嘴鼓，三不二時還會聽著福佬話同客話混雜个聲哦！

最引起興趣係薪傳師邱先生採錄臺灣各處饒平客庄特色話，配合靜修國小1953年个老校歌進行曲，填詞後獨唱，錄做一首《湊合饒平客話》个歌曲，朗朗歌聲遽遽上口咧！

最尾，邱先生上網解說參加客語百句認證个方式，示範操作同測驗，希望大家煞猛練習通過認證，共下創造員林新个歷史記錄，拂忒「員林客家人毋會講客」个印象，像《湊合饒平客話》尾段歌詞樣仔：員林永靖饒平客多，饒平客話正必目，共下煞猛直直行，勞力勞力！好得好得你！