饒平客語在靜修國小返生咧(記者會)

饒平客語在靜修國小返生咧
文/臺灣客語薪傳師邱美都                         圖/黃文堯

員林係臺灣第一大鎮，人口逼近12.5萬人，有三股二係客人，係臺灣饒平客最大个聚集區，但係這下無人會講饒平客話。員林鎮靜修國小本土語言先生邱美都，抑係臺灣績優文史教育工作者，因為恁樣，為著返生祖宗言，前年花費一年煞猛學客，高分通過客委會中高級認證，舊年變做彰化縣單淨一儕个臺灣客語饒平腔薪傳師。

    2014年除忒利用拜二摎拜四朝晨時節，義務指導學生客語社團，同時打拼摎客委會申請傳習計畫，推展「饒平客話親子共學」活動。還吂著二隻月，從完全毋會講客，既經學會客語饒平腔100句、常用220語詞、朗讀唐詩〈金縷衣〉、唸謠〈遊戲歌〉、兒歌改唱〈四儕老虎〉、〈食飽吂〉、饒平地方話摎〈湊合饒平客話〉唱曲，抑會運用《客語百句認證網》、《哈客網路學院客語能力認證基本詞彙饒平腔》、《臺灣客語常用詞辭典》，學習成果恁豐湃哦！

    四月總共有42名親子通過客委會「客語百句認證」饒平腔，當中有21名通過六腔認證，學生12名、成人9人，得著150張合格證書，有5對客語家庭親子都係六腔通過：一係唐云芳+吳蓎妤+吳沚璃母女三人，二係賴育伶+陳冠璋母子，三係曾秀娟+李正一母子，四係董秋蘭+陳冠宇母子，五係劉月仙+黃昱彰兩子阿嬤。另外，還有學生黃尚傑、游佳靜、賴映岑、黃筠淇、游幃丞，大人黃平祐、黃港友、董秋蘭、陳瑤華、邱美都。

客語薪傳師邱美都講，客語饒平腔在臺灣面臨消失个危險，好得客委會經費補助，靜修國小援助，分親子做得共下學客，共下來講百年前个祖先言，正知前人个生活語言故事。參加親子共學摎朝晨社團个學員，最細係9歲，最老係72歲，輕鬆入門開口講客，人巨兜緊學緊有興趣，有42名參加客語百句認證全部通過，總共得著150張客委會客語百句認證合格證書，看著靜修國小正必目个饒平客話苗圃，從無到有返生消失百年个祖宗言，實在無簡單哦！

    靜修國小校長黃榮森講：「客語饒平腔做得在靜修國小生根必目，恁有歷史教育意義，希望大家共下來講客，分員林个客語教育做得壯旺成林」。學員紛紛在問卷調查表頂項寫出學客个感受，抑希望客委會、靜修國小、薪傳師定著愛連續合作開班，人巨兜過愛學客咧！還愛主動邀請親朋好友，共下來靜修國小學客，預定7月開親子共學第二期，歡迎大家來報名參加。4月23日上晝，靜修國小客語教室个記者會鬧熱煎煎，有客家電視臺記者李新隆、彰視新聞臺記者許士源，還有報紙記者周為政、林碧珠、吳東興、張文熹……實況傳播員林饒平客話返生咧