上網輕鬆學饒平客話

上網輕鬆學饒平客話

靜修國小饒平客話親子共學班  
教學日誌6 
2014.4.10(四)下午1-4點   

文/臺灣客語薪傳師邱美都

這係第六擺个親子共學時間，大家都盡惜哦！毋單淨上課認真，轉屋下還歡喜練習，故所逐擺薪傳師邱先生做得感覺有進步，分人看到恁感心咧！邱先生逐擺都用饒平客話寫出親子共學个教學記錄，現下摎上兩擺个教學日誌內容印分大家看，學員跈邱先生大聲誦讀，還欣賞饒平客話小品文，提升聽讀个能力。

遽遽複習以後，接等推出16句生活長透聽得著个會話，40個生活語詞，加強練習講客。邱先生範唸、領唸、華客語對照抽問、語詞講話練習，逐儕都認真學習，熱氣湧湧哦！還慢慢仔紹介網路學客，有客語百句認證網、哈客網路學院、臺灣客家語常用詞辭典，邱先生摎三儕重要个網路入徑方式寫著白紙上，大家上網註冊加入會後分組討論練習。特別係客語百句認證，邱先生進行模擬測驗示範，還選幾多句饒平話摎四縣腔、南四縣腔、大埔腔、海陸腔、詔安腔，同時比較一下無共樣个讀法。

時間盡遽洩走，課程結束前，既經有學員通過客語百句認證咧，紛紛傳出恭喜个祝福聲，邱先生希望大家轉屋下遽遽參加客語百句線上檢測。最尾，大家共下講：邱先生勞力！大家勞力！行路愛細義、騎機車愛細義、正來尞！