到卓蘭老庄遊學道地饒平話，左起邱美都、三叔公、卓蘭饒平文化協會理事長詹前慶、博士黃莉芸(邱美都攝120228)
到卓蘭老庄遊學饒平話
文/邱美都
一百零一年二月，冬尾恁寒，二二八連等四个放尞日，天時無好，雨落無停，臺灣人時行到山頂項看櫻花，毋過人厓決定自家到卓蘭老庄去遊學臺灣客語饒平話，希望擲忒永靖饒平客，毋會講客个宿命。
二二七拜一朝晨烏陰烏陰，人厓從員林坐火車到豐原，過加坐豐原客運，點過鐘就到卓蘭王爺廟咧！下車後，打先參拜卓蘭人个守護神三山國王。這時轉風頭，看得著天頂落下雨毛仔。
當慨个林教官來咧！佢笑笑仔講：「好天係老庄人个緊工時節，落雨天係老庄人个放尞日，你運氣當好，做得摎盡多老人家打嘴鼓」。
上晝來到老庄農村再生促進會長陳德文个屋下，阿文哥生來砸磳，打電話尋來熱心个社區理事長阿金哥，厥姊詹淑女係臺灣饒平話專家喔！
人厓兜待在屋肚，有阿慶哥、阿文哥、阿連心婦、阿金哥、阿安哥、阿貞妹、阿芬妹，全部係饒平話師傅，一儕接一儕唸《好客100句饒平腔》，阿都妹跈唸跈錄，跈錄跈討論，饒平話跈人會着，當暢喔！勞力喔！
下晝斷雨腳，天開咧，趕好天緊緊出門遶遶仔，順續遶山景。行過老庄橋、諺語風車、兩百年老樹、伯公廟、昭忠廟、詹姓祖廟、峨崙廟、梨園、老庄溪，心情當好。大樹下盡鬧熱，老人家相堵頭定著會相借問，閒閒共下食茶行棋，講講笑笑當樂暢。伯公廟前，大家共下來打嘴鼓，「老庄大樹下等」个諺語故事當心色。
行過老庄後街，來到阿慶哥屋下坐，佢兜四代同堂安然自在，阿慶哥提出烏白相片講古，厥爸益枝日本時代識做過農業指導員，頭擺在老庄教人唱日本歌仔，舊年轉去長山賣鴨卵咧，到今庄民盡想念。
暗晡夜天時清冷，人厓自家戴在打鐵坑農場屋肚，內心感覺當燒暖。天光日，二二八拜二打早落雨，雞合屋簷鳥唩，沙鼻唱山歌，喊人厓跋起來咧。企在門檻脣看外背，山林壁角打露滴滴答答！屋簷水答答滴滴！聽來合客家俗諺「屋簷水點點對」个意義共樣，上輩對下輩在傳承。日時頭，卓蘭饒平文化協會理事長阿慶哥、會計阿淼哥、三叔公阿祥哥、博士阿芸妹，大家共下在屋肚唸《客語能力認證基本詞彙饒平腔》。
臨暗仔，日頭西，打鐵坑上背个風坑起大霧，農路彎彎斡斡，阿慶哥細義駛車，渡人厓遶山花。佢講頭擺有盡多旱地無麼个錢，幾年前，有庄民變做農場，當得人惜喔！斷烏來到山林壁角个風坑，行入阿慶哥果園，做得看到卓蘭平洋風光，逐儕都講這个山頭地理盡好。
講著阿慶哥，佢係手路盡厲害个果子達人，長年透底逐日耕山打林，艱苦煞猛，莫看果園幾坵，上夏打一結，有錢好落袋，盡暢喔！阿慶哥打算過加做一座停車場，歡迎好朋友來風坑果園尞。
交春時節个卓蘭，有時落雨有時晴，老庄三片都有山，企在半山腰看光景，山形當靚，青山綠水好風光。半山客老庄人，晴耕雨讀知上下，隔壁鄰舍一家親，低言細語个饒平話，聽起來盡心色，卓蘭老庄係臺灣難得个饒平窟。
臨走時，阿慶哥分人厓講，愛長在到老庄來尞，饒平話正講得好。唉呀！兩日个遊學，一目聶目就溜走咧，人厓早著愛上老庄，饒平共鄉个感情割毋忒，想愛歇加幾夜，毋過愛轉員林上班，盡毋盼得離開啊！另日，三不二時，還會到老庄尋朋友尞，親愛个老庄鄉親做得無？
到卓蘭詹姓祖廟遊學，閩南語的在地玩笑話「卓蘭底姓詹的比較(狗)卡濟」(邱美都攝120227)
到卓蘭老庄詹姓河間堂遊學(邱美都攝120227)
沒有留言:
張貼留言