快樂的老歲仔人

快樂的老歲仔人

分類：閩南語寫作

2013/07/10 17:14

           

           快樂的老歲仔人

                                                                              文/邱美都  10分鐘順手寫

雖然我有歲矣，毋過老罔老，猶會哺塗豆，跤手溜掠的我，透早天未光，就步lian2去社區公園運動，順sua3沃花做志工，轉厝閣會赴攢早頓，tshua7孫仔去讀冊。

中晝食飯飽，小眠一下，等精神飽足矣，有時看冊，有時上網揣資料，貼寡仔生活相片，寫寡仔生活經驗，予我的部落格鬧熱彩彩，短短無上年，粉絲的點閱率嘛規偌萬。欲暗仔，囝兒序細攏總圍佇灶跤的食飯桌，享受我煮的手路菜，那食那開講，幸福的滋味吞落腹。

各位親朋戚友，你看我gau3做閣gau3走，人阮孫仔喙真甜，定定講我是邱家的寶。論真講起來，我確實是一个快樂的『銀髮族』。我認為食一歲學一會，做人愛活到老學到老，有量就有福，對人莫受氣、莫計較，歡喜一工，煩惱嘛一工，凡事歡喜做甘願受。向望咱老歲仔伴，逐家攏身體勇健食百二，做一个笑咍咍的臺灣珍寶。

邱家的新婦佮查某囝(楊銘欽攝於邱氏宗祠2013春)